196
19:16
25 Avqust 2019

Honkonqda yenidən aksiyalar başladı

Honkonqda bu gün də etiraz aksiyaları keçirilir.
APA -nın "Alman dalğası"na istinadən verdiyi məlumata görə, polis ilk dəfə aksiyaçılara qarşı su şırnağından istifadə edib.
Yağan yağışlara baxmayaraq, Honkonqun şimal-qərbindəki Tsyun-Van rayonunda minlərlə insan küçələrə çıxıb. Aksiyaçıların bəziləri barrikada qurub, polisə yandırıcı maddələr doldurulmuş butulkalar atıblar. Polis öncə gözyaşardıcı qazla aksiyaçıları dağıtmağa çalışıb, daha sonra su şırnağından istifadə edib.
Qeyd edək ki, Honkonqda etiraz aksiyaları 3 aydır ki, davam edir. Muxtariyyət hökumətinin qanunları pozmaqda şübhəli sayılanları və cinayətkarları Çin hakimiyyətinə təhvil vermək niyyəti Böyük Britaniyanın hakimiyyəti altında olmuş Honkonqda 1997-ci ildən sonra ən böyük kütləvi aksiyaların başlaması ilə nəticələnib. 1997-ci ildə Honkonqun geri qaytarılması müqabilində Çin bu ərazidə ən azı 50 il ərzində insan hüquqlarının, KİV azadlığının qorunacağı vədini verib. Müxalifət isə muxtariyyət hökumətini "bir ölkə, iki sistem" prinsipini pozmaqda ittiham edir.
İyulun əvvəlində Honkonq administrasiyasının rəhbəri Kerri Lam Çinə ekstradisiya ilə bağlı qanun layihəsinin gündəlikdən çıxarıldığını bəyan etməsinə baxmayaraq, aksiyaçıların qanun layihəsinin parlamentdən təcili geri götürülməsi barədə tələbini yerinə yetirməyib. Davam edən aksiyalar zaman-zaman zorakılıq müstəvisinə də keçir.
Artıq aksiyalarda demokratik islahatların keçirilməsi, K. Lamın istefası, aksiyalarda yol verilən polis zorakılığının araşdırılması tələbləri irəli sürülür.